العفاريت في الحلم

وانا صغيرة كنت بحلم حلم غريب جدا, كنت بحلم بيه كل يوم

الحلم كان بيبتدي في الضلمة بالليل وف شارع طويل اوي, و مليان ناس كتير, و كنت با امشي لوحدي و كل ما اقرب من حد  عشان استخبي فيه يتحول لعفريت, حتى اقرب الناس ليا, كنت برضة كل ما اقرب منهم يتحولوا و يجروا ورايا و يخربشوني

و اصحى من النوم الاقي نفسي بعيط و جسمي متخربش

و لما حكيتلهم في البيت قالتلي واحدة من قرايبي , الحلم ده عشان انتي بتخافي من الناس و مش بتتعاملي معاهم

فعلا انا كنت انطوائية اوي و ماكنتش باتكلم مع حد, كنت كل يوم آجي من المدرسة و اقفل الاوضة عليا و اقعد ساكتة, احيانا كنت باتكلم قليل اوي مع نفسي,اصلي كنت با احس ان نفسي دي غريبة عنى, كنت با اخاف من الناس, كنت با اخاف احب حد , اصلي لما با احب باحب اوي, و لما حد بيعمل حاجة غبية با اكرهه, ولما با اكره با اكره اوى, مفيش عندي وسط

الحلم دة انتهى, انتهى بقالو سنين عشان انا بقيت با اتعامل مع الناس , بقيت با اتكلم كتير, وتقريبا مش باقعد لوحدي خالص

بس النهاردة حصلت حاجة غريبة, انا حلمت نفس الحلم, لكن لما صحيت ما لقيتش نفسي معيطة, بس لقيت ايدي فيها خربشة ... مش عارفة هو انا كنت باضحك علي نفسي؟ انا لسه بخاف من الناس؟

Reply